ശിവ ശിവ ഇപ്പൊ ഭക്ത ജനങ്ങളുടെ വരവ് തീരെ കുറവ് ആണെന്നെ. വേള്ഡ് കപ്പ് ക്രിക്കറ്റ്, ഐ പി എല് , ഫുട്ബോള് എല്ലാം ഇപ്പൊ തൃസന്ധ്യ നേരത്താ കളി.ദീപാരാധന തൊഴാന് വരുന്നവരൊക്കെ കമ്മി ആയി. അഥവാ തെറ്റി തെറിച്ചു ആരെങ്കിലും വന്നാ ഇവിടത്തെ കഴകക്കാരന് അവരെ പേടിപ്പിച്ചു വിടുന്നു. മൂര്ഖന് പാമ്പ് ഉള്ള സ്ഥലം ആണ്, കാല പുരിയേല് ചെന്നില്ലേല് കാലത്തേ കണ്ടിടാം എന്ന് പ്രാര്ഥിച്ചു പോയ്ക്കോ എന്നെല്ലാമാണ് ആ ശുംഭന് അവരോട് പറയുന്നത്. നിങ്ങള് തന്നെ പറ ... ഇങ്ങിനെയെല്ലാം കേട്ടാല് ആരാ ഇവിടെ വരുക ? ഇന്നാളൊരു ദിവസം ഏതോ ഒരു ഭക്തന് വന്നു ഭണ്ടാരത്തില് കാശിനു പകരം കല്ല് ഇട്ടിട്ടു പോയിരിക്കുന്നു...! recession ന്റെ ഓരോ അനന്തര ഫലങ്ങളെ...ഇപ്പൊ ഇപ്പൊ ആയി അമ്പല കമ്മിറ്റിക്കാര് ശമ്പളം തരേണ്ട ദിവസം ഇങ്ങോട്ട് തീരെ വരാതായി. എപ്പോഴെങ്കിലും കണ്ടു കിട്ടുമ്പോള് എന്റെ വല്ലായ്മ പറയുമ്പോ ദൈവം യഥാര്ത്ഥ ഭക്തരെ ഒരു പാട് പരീക്ഷിക്കും എന്നാണ് കിട്ടുന്ന മറുപടി.. എന്താ ഇവരെ ഒക്കെ പറയുക ? പേരെടുത്ത അമ്പലത്തിലെ പേരെടുത്ത ശാന്തിക്കാരന് ആണ്, ലക്ഷാര്ച്ചന നടത്താന് ഒരു ബീഡി വലിക്കുന്ന സമയമേ എടുക്കൂ എന്നൊക്കെ വലിപ്പം പറഞ്ഞിട്ടെന്താ ?എന്റെ അശാന്തിക്കു വല്ല കുറവുമുണ്ടോ ?
